Pushimet përfunduan për Giorgia Melonin, e cila është rikthyer në Palazzo Chigi pasi ka kaluar disa ditë relaksi me familjen në Pulia. “Në punë për të ndërtuar një Itali që mendon sërish për gjëra të mëdha, duke qenë e vetëdijshme për vlerën e saj dhe potencialin e saj ende të pashprehur”, shkroi kryeministrja italiane në Facebook. Meloni kaloi disa ditë pushimi në një shtëpi-fermë në Pulia në Ceglie Messapica, në provincën e Brindizit. Pushimet i ka kaluar së bashku me familjen, partnerin Andrea Giambrunon dhe vajzën e tij Ginevra. Gjithashtu, me ftesë të kryeministrit shqiptar Edi Rama, Meloni dhe familja e saj udhëtuan me target drejt Vlorës, ku qëndruan për tri ditë në rezidencën qeveritare shqiptare. Meloni u shfaq pak gjatë pushimeve të saj në Shqipëri, megjithatë para se të largohej, bëri një shëtitje në Vlorë dhe konsumoi një kafe me kryeministrin Rama, në një nga baret e qytetit bregdetar jugor.