Deklaratat e forta dhe përplasjet mes dy drejtuesve kryesor të shtetit shqiptar, presidentit Ilir Meta dhe kryeministrit Edi Rama për Paktin Detar me Greqinë nuk i kanë shpëtuar mediave greke. “Një përballje e ashpër midis Presidentit të Shqipërisë Ilir Meta dhe Kryeministrit Edi Rama provokoi dekreti Presidencial për shtrirjen e ujërave territoriale greke në 12 milje në Jon” shkruajnë mediat në Athinë. Presidenti shqiptar, vijon më tej shkrimi, “pretendon se nga viti 2018 ai nuk ka asnjë informacion mbi ecurinë e bisedimeve midis Greqisë dhe Shqipërisë dhe zotohet se kur të ketë të gjitha informacionet nga qeveria e vendit të tij ai do të informojë publikun”. Por, “Edi Rama thekson se ky vendim i Greqisë nuk ka asnjë lidhje me demarkacionin midis dy vendeve” thuhet në shkrim. Mediat në shtetin fqinj i kanë bërë jehonë gjithashtu deklaratës së Ramës, i cili e ka cilësuar të drejtë dekretin e Athinës për shtrirjen nga 6 në 12 milje në deti Jon dhe si një mesazh për Ankaranë. Protothema shkruan se “e drejta e Greqisë për të zgjatur sovranitetin e saj në 12 milje detare në Ishujt Jon dhe Jon deri në Kepin Tainaro në Peloponez mbrohet nga Kryeministri shqiptar, Edi Rama”.