Një tunel i fshehur ndërkufitar i përdorur për të kontrabanduar emigrantë dhe kontrabandë mes SHBA-së dhe Meksikës do të mbyllet, njoftuan zyrtarët e kufirit. Tuneli prej afro 300 metrash të nxjerr në El Paso në Teksas u zbulua javën e kaluar. Ndërkohë një hetim është duke u zhvilluar nëse autoritetet lokale në të dyja anët e kufirit kishin apo jo dijeni për ndërtimin e tij nga ana e trafikantëve, të cilët mendohet se kanë punuar rreth një vit për ta hapur. Siguria është rritur në të dy anët e kufirit përpara inaugurimit të Donald Trump, i cili është zotuar të nisë dëbimet masive të emigrantëve të paligjshëm sapo të jetë në detyrë. Tuneli kishte trarë druri me qëllim që të parandalonte shembjet dhe ishte i pajisur me ndriçim dhe ajrim. Zyra e Prokurorit të Përgjithshëm të Meksikës është ngarkuar të hetojë nëse zyrtarët lokalë kanë qenë bashkëpunëtorë në ndërtimin e tunelit, tha për mediat meksikane gjenerali Jose Lemus, komandanti i garnizonit ushtarak të Ciudad Juarez. Tuneli u zbulua më 10 janar, pasi agjentët e patrullës kufitare të SHBA hoqën një pllakë metalike që mbulonte vrimën e hyrjes në tunel dhe më pas njoftuan homologët e tyre meksikanë për ekzistencën e tij.