Kryeministri i Kosovës, Albin Kurti tha se banorët lokalë serbë në veri të kosovës "nuk kanë automjete të blinduara, dhe asnjë civil tjetër në Republikën e Kosovës po ashtu. Ai e quajti “formacion profesionist” grupin e personave që kreu sulmin e armatosur. "Nga ato çfarë kemi mësuar deri tani, janë ato që i kemi menduar edhe më herët. Bëhet fjalë për një formacion terrorist e kriminal, profesionist, i cili e ka planifikuar dhe përgatitur gjatë këtë çfarë ka kryer sot. Nuk paraqet një bandë të kontrabandës, por një strukturë mercenare, e cila është e përkrahur politikisht, financiarisht e logjistikisht nga Beogradi zyrtar”, tha Kurti në një deklaratë për media. Ministri i Brendshëm i Kosovës, Xhelal Sveçla, tha më herët se u arrestuan gjashtë persona - dy prej tyre sulmues dhe katër të tjerë që e mbështetën sulmin në lidhje radio, dhe se aksioni i Policisë për kapjen sulmuesve të tjerë vazhdon. Kryeministri Albin Kurti, sulmin mbi policinë e Kosovës e ka cilësuar "terrorist” duke thënë se "krimi i organizuar me mbështetje politike, financiare dhe logjistike nga Beogradi zyrtar po sulmon shtetin tonë”.