Lideri i Koresë së Veriut, Kim Jong Un i ka ofruar Moskës “mbështetje të palëkundur” në luftën e saj në Ukrainë, sipas raportimeve të mediave shtetërore. Në bisedimet me ministrin e Jashtëm rus, Sergei Lavrov në Korenë e Veriut, Kim ka thënë se Pheniani është në linjë me “të gjitha veprimet e udhëheqjes ruse” për të luftuar “rrënjën e problemit të krizës ukrainase”. Zyrtarët perëndimorë besojnë se Pheniani ka dërguar rreth 11.000 trupa ushtarake në Rusi vitin e kaluar për të luftuar kundër Ukrainës. Sipas agjencisë shtetërore të lajmeve të Koresë Veriore, KCNA, Kim dhe Lavrov janë takuar të shtunën “në një atmosferë të ngrohtë dhe miqësore”. Lideri koreanoverior ka shprehur “besimin e plotë që ushtria dhe populli rus do të fitojnë në plotësimin synimit për mbrojtje të dinjitetit dhe interesave bazike të shtetit”. Në Telegram, Ministria e Jashtme ruse ka publikuar një video ku shihen dy zyrtarët duke përshëndetur njëri-tjetrin dhe duke u përqafuar. Rikonfirmimi i mbështetjes ushtarake të Koresë së Veriut për Rusinë vjen ndërsa presidenti amerikan, Donald Trump ka bërë të ditur rikthimin e ndihmave ushtarake në Ukrainë, pas një pauze të vogël. Trump i tha transmetuesit televiziv NBC të enjten se ka bërë marrëveshje me NATO-n që Shtetet e Bashkuara t’i dërgojnë Ukrainës sisteme për mbrojtjen ajrore, përmes aleancës. Njoftimi i Trumpit erdhi në kohën e intensifikimit të sulmeve ajrore ruse në Ukrainë. Pheniani ka pranuar në prill të këtij viti se ka të angazhuara trupa ushtarake në Rusi, disa muaj pasi Perëndimi ofroi dëshmi se një numër i madh ushtarësh janë në vijën e frontit mes Rusisë dhe Ukrainës. Kim ka nënshkruar një marrëveshje me Putinin në qershor të vitit të kaluar, duke u pajtuar për të mbështetuar njëri-tjetrin, nëse ndonjëri prej tyre përballet me “agresion”.