Skema e mbështetjes direkte për fermerët do të ndryshojë. Kështu paralajmëroi ministri i Bujqësisë, Andis Salla. Sipas tij, skema e re do të marrë parasysh shqetësimet dhe propozimet e fermerëve. salla - “E dimë shumë mirë që skema e mbështetjes direkte është tema që ju prek më shumë. Kemi marrë nga ju mesazhe— komente, ide, kritika dhe sugjerime: për kriteret, mënyrën e ndarjes së fondeve, dhe ndjesinë që disa kategori fermerësh ndihen më pak të mbuluar. Ndaj sot dua ta them shumë qartë: Do ta rishikojmë skemën kombëtare të mbështetjes. Ne kemi për qëllim të ndërtojmë një marrëdhënie të drejtpërdrejt mes Qeverisë dhe gjithsecilit prej jush. Pikërisht duke ju referuar atyre komenteve, ideve, kritikave që përmenda me lart. Së bashku me ekipin do të jemi në 12 qarqet e vendit për të diskutuar për nevojat, ndryshimet dhe për t’u përshtatur me realitetin në terren.” Ministri i bëri këto deklarata gjatë një eventi me fermerët, ku i pranishëm ishte edhe Kryeministri Edi Rama.