7 deputetë të Partisë Socialiste kanë kërkuar mbledhjen e Sekretariatit të Etikës në Kuvend dhe marrjen e masave ndaj 5 deputetëve të PD, përfshi ish-kryeministrin Berisha, pas bllokimit të foltores së Kuvendit në seancën e së enjtes. Lidhur me këtë kërkesë ka reaguar deputeti demokrat Saimir Korreshi, I cili ka hedhur një lum akuzash ndaj Kuvendit dhe drejtueses së tij, si pjesë e këtij sekretariati. Ai akuzon për qëndrime të padrejta duke pyetur se përse kërkesa e deputetëve demokratë për përjashtimin e Ramës nuk është zbatuar. “O mjerane drejtues o punetor partie, o patronazhiste. Po kerkesa e dates 22.12.2022 per perjashtimin e Edi Rames e firmosur prej meje dhe 6 deputete te tjere pse nuk shqyrtohet?? Cili eshte motivi qe e mbani ne sirtar ndersa per perjashtimin e deputeteve te PD e caktoni pa kaluar 24 ore??”, shprehet Korreshi, teksa kërkon përgjigje nga kryeparlamentarja Nikolla dhe drejtuesja e sekretariatit, Klotilda Bushka. Korreshi shprehet se maxhoranca po tenton të largojë zërat opozitarë nga Kuvendi, teksa thekson se kjo masë nëse duhet të merret, duhet edhe ndaj tij, pasi ka qenë edhe ai në foltore. “Me motive bajate e me nxitim nga halli qe e ka zene Ramen doni te largoni zerat opozitare nga Parlamenti. Edhe une isha aty ne foltore para jush me perjashtoni dhe mua ose terhiqeni keto letra turpi e therrisni Ramën e shqyrtoni kerkesen e dates 22.12.2022 per perjashtimin e tij” thekson Korreshi.