Irani tha mbrëmjen e të enjtes se i gjithë materiali i tij bërthamor ishte zhvendosur në 'një vend të sigurt' pasi Presidenti amerikan, Donald Trump, u tërhoq në mënyrë dramatike nga hyrja në luftë. 'Izraeli goditi Natanzin, Isfahanin, Khandabin dhe Arak-un, por ato ishin evakuuar tashmë', tha komandanti iranian Mohsen Rezaei në televizionin iranian të enjten. 'Të gjitha materialet janë zhvendosur në një vend të sigurt', shtoi ai. Rezaei paralajmëroi ndërkohë kundër një armëpushimi, duke pretenduar se kjo do t'i jepte Izraelit një mundësi për t'u rikuperuar. "Nuk duhet të lejojmë që armiku, i cili aktualisht është në një pozicion të dobët, të ringjallet me një armëpushim", tha ai, duke shtuar se Irani kishte përdorur "më pak se 30%" të kapaciteteve të tij ushtarake dhe po "e përshkallëzonte gradualisht luftën". "Mund të arrijmë në një pikë ku të ndërmarrim veprime të mëdha që do të destabilizojnë të gjithë rajonin", kishte paralajmëruar ai më herët duke u bërë thirrje udhëheqësve amerikanë dhe evropianë të veprojnë shpejt. "Njerëzit e mençur në SHBA dhe Evropë duhet të veprojnë shpejt për të nxjerrë vendet e tyre nga kjo luftë, përndryshe nuk mund të rrimë duarkryq dhe të shikojmë përfshirjen e tyre pa reaguar", tha ai. Izraeli ka lëshuar raketa drejt Iranit në një përpjekje për të dëmtuar aftësitë e tij bërthamore që nga e premtja e kaluar, dhe Presidenti i SHBA-së Donald Trump po mendonte të përfshihej. Por, Trump u tërhoq në mënyrë dramatike nga pragu i krizës mbrëmjen e të enjtes. Në 48 orët e mëparshme, Presidenti i SHBA-së kishte kërkuar 'dorëzimin pa kushte' të Iranit dhe kishte kërcënuar me sulme ajrore 'brenda disa ditësh'. Megjithatë, pasi kaloi pasditen i mbyllur në Dhomën e Situatave në Shtëpinë e Bardhë, ai tha se do t'i jepte Teheranit dy javë kohë për të arritur një marrëveshje. Afati kohor prej dy javësh i dhënë nga Trump është një taktikë që Presidenti e ka përdorur më parë, veçanërisht me Vladimir Putinin mbi të ardhmen e Ukrainës. Por, duke qenë se ky afat ka kaluar dy herë pa asnjë lëshim nga presidenti rus, mbrëmjen e të enjtes pati pikëpyetje se sa serioze janë të gjitha fjalimet e ashpra të Trumpit.