Që prej 15 tetorit e cdo ditë në vijim, Policia e shtetit në njoftimet e saj zyrtare ka publikuar edhe shifrat e të gjobiturve për ata që nuk mbajnë maska, në zbatim të aktit normativ të qeverisë. Paratë do të merren nga qytetarët përmes faturës së energjisë elektrike, ashtu siç është bërë e ditur edhe më herët nga instancat shtetërore. Burime nga Policia e Shtetit konfirmojnë se grupmosha më e gjobitur për mos mbajtjen e maskës është nga 20 deri në 40 vjeç. Brenda kësaj fashe, më të rinjtë kanë numrin më të lartë të ndëshkimeve.Nga ana tjetër, moshat nga 40 deri në 60 vjeç zënë një përqindje të vogël të gjobave, numri i të cilave ka arritur në mbi 15 mijë deri tani. Infektimet e reja dhe fatalitetet nga Covid 19 nuk njohin limit në Shqipëri prej disa javësh, por as gjobat e policisë e jo më lutjet e krerëve të institucioneve nuk i bindin shumë qytetarët për ta mbajtur maskën. Maskat neglizhohen nga qytetarët edhe në urbane, ndërsa distanca në orare të caktuara të ditës është thuajse e pamundur. Në kafene përjashtohet mbajtja e maskës. Shifrat e infektimeve ditore tregojnë se alarmi i kuq është ndezur dhe për ekspertët e shëndetësisë duhet të jetë e qartë se gjobat nuk mjaftojnë. Megjithatë Dhjetori nisi me të njëjtat masa për të cilat vetëm universitetet dhe shkollat duhet të shmangin rrezikun.