Shpërdorimi i detyrës, mashtrimi i kryer në bashkëpunim me pasoja të rënda, kontrabanda e mallrave për të cilat paguhet akcizë dhe fshehja e të ardhurave janë akuzat për të cilat gjykata e Tiranës ka dhënë masën e sigurimit personal arrest me burg për 7 persona, ndërsa për një tjetër arrest shtëpiak nga 8 gjithsej. Bëhet fjalë për zyrtarët e Agjencisë Kombëtare të Burimeve Natyrore, ndaj të cilëve Policia zbatoi urdhrat e gjykatës për arrestimin e tyre. Hetimet disamujore nisën nga Prokuroria, e cila në momentin e vlerësimit të elementëve të veprës penale kërkoi nga gjykata masa të sigurimit personal për Isuf Berberi, Denis Durrsin, Qani Hoxhajn, Simon Markun, Arben Dodën, Naim Kasën dhe Klodian Gradeci. Ndërsa për Rezarta Qosen u dha masa e sigurisë arrest shtëpiak. Të gjithë këta persona në bashkëpunim me njëri tjetrin kanë konsumuar veprat penale të mashtrimit, përmes shpërdorimit të detyrës, duke shkaktuar një dëm të madh në buxhetin e shtetit.