Greqia do të hapë shkollat në 11 janar. Lajmin e ka bërë të ditur zëdhënësi i qeverisë, Stelios Petsa, i cili tha se janë marrë masa paraprake për hapje të sigurt të shkollave. Ai shpjegoi se vendimi për bllokimin e vendit ishte një mënyrë për të shmangur përhapjen e sëmundjes edhe për shkak të aktivitet të lartë që mund të kishte në prag festash. Gjithashtu ai sqaroi se mbështetja për ekonominë dhe bizneset do të vijojë, qeveria në 2021 siç edhe ka premtuar do të marrë masa lehtësuese për ata që preken në Covid-19. “Prioriteti i qeverisë janë ulja e barrierave tatimore, ne nuk do të lejojmë që bizneset të mbyten nga borxhet”, tha Petsas. Nderkohe qe nje dite me pare Greqia riktheu masat më të ashpra anti covid, që do të zgjasin për të paktën një javë, me qëllim reduktimin e rasteve të reja dhe zbutjen e presionit mbi spitale. Kështu, duke filluar nga e diela e deri të hënën e 11 janarit, do të ketë një ndalim qarkullimi në të gjithë vendin nga ora 21 e mbrëmjes e deri në 6 të mëngjesit. Dyqanet jo të domosdoshëm, dhe libraritë, parukeritë etj do të qëndrojnë të mbyllura. Kishat do të mbyllen po ashtu për meshën e të dielës dhe atë të ditës së epifanisë, më 6 janar.