Gjatë kësaj jave u mbajtën dy samite urgjente në Evropë dhe u panë deklarata shqetësuese nga presidenti ukrainas, Volodymyr Zelensky, duke nxjerrë në pah frikën në kryeqytetet evropiane, nga Kievi e deri në Londër. Frika ka të bëjë veçanërisht me atë që Uashingtoni dhe Moska mund të tentojnë të arrijnë një marrëveshje për të ardhmen e Ukrainës pa Kievin dhe aleatët e SHBA-së në Evropë. Zyrtarët amerikanë kanë mohuar se dëshirojnë të përjashtojnë këdo nga procesi. Por, sugjerimi i SHBA-së se Evropa nuk do të jetë në tavolinën e negociatave ka shkaktuar alarm të gjerë dhe atmosfera e ngrohtë nga takimi SHBA-Rusi në Riad më 18 shkurt gjithashtu ka shqetësuar shumë njerëz. Por a do të mundet uashingtoni dhe moska të arrijnë një marrëveshje të pranueshme për të dyja palët, për ti dhënë fund luftës në ukrainë? Shtëpia e Bardhë është e qartë se do paqe. Nuk është e qartë nëse diçka të tillë e do edhe Moska. I dërguari i posaçëm i Trumpit për Ukrainën dhe Rusinë, Mark Kellogg, shkoi në Kiev disa orë pasi sulmet ajrore ruse gjatë natës goditën Ukrainën. Afër 250.000 persona mbetën pa energji elektrike në qytetin-port të Odesës, teksa temperaturat ishin nën zero. Në Moskë, ministri i Jashtëm, Sergei Lavrov, i tha Dumës shtetërore se “kriza nuk duhet të zgjidhet me një armëpushim”. Nëse Kremlini është i gatshëm për një marrëveshje, ai ka gati kushte të forta. Skenari më i tmerrshëm për Ukrainën dhe aleatët e saj evropianë është që Uashingtoni të pajtohet me një kusht të këtij lloji. Zyrtarët amerikanë kanë thënë se të dyja palët në konflikt do të duhet të bëjnë lëshime, por nuk kanë ofruar detaje se çfarë lëshimesh mund të ketë për Rusinë. I pyetur për këtë çështje ndërsa merrte pjesë në Konferencën për Siguri në Munih, Kellogg tha: “Do të ketë lëshime territoriale” dhe “mund të ketë edhe heqje dorë nga përdorimi i forcës”. Skeptikët kanë paralajmëruar se Shtetet e Bashkuara po japin shumë dhe shumë shpejt, në kërkim të një fitoreje të shpejtë dhe të lehtë diplomatike. Por, nëse ka një marrëveshje që Ukraina dhe Evropa nuk e pranojnë, çfarë do të ndodhë më pas? Ministri i Jashtëm ukrainas, Andriy Sybiha, u pyet në Munih se si do të dukej “mospranimi” i një marrëveshjeje të keqe nga Kievi? “Ne dimë si të rezistojmë. E kemi dëshmuar këtë në fushëbetejë”, tha ai.