Greqia do të kërkojë rinisjen e negociatave për një Marrëveshje per Detin dhe me Shqipërinë. Lajmi është bërë i ditur nga gazeta greke ‘Ta Nea”. Sipas të përditshmes greke, qeveria e Micotaqis pas nënshkrimit të marrëveshjeve të ndarjes së kufirit detar me Italinë dhe Egjiptin, pritet që së shpejti të rifillojë bisedimet me Shqipërinë. Ky ndryshim kursi i diplomacisë greke vjen pas marrëveshjes së Turqisë me Libinë për zonat detare si dhe tensionet e shumta që ka Greqia me Turqinë ditët e fundit për kërkimet për gaz në rajonin detar të Mesdheut Lindor. ‘Ta Nea’ thekson se Athina do të përpiqet të arrijë të gjejë gjuhën e përbashkët me Tiranën për të arritur sa më shpejtë një marrëveshje për kufirin detar. Diplomatët grekë vlerësojnë se pas përcaktimit të kufijve detar midis Greqisë e Italisë, arritja e marrëveshjes me Shqipërinë ka për të qenë më e lehtë se më parë.