Ministria e Punëve të Brendshme të Malit të Zi njoftoi të shtunën se ka ngrirë 44 prona të 34 qytetarëve rusë, pasi BE ka vendosur sanksione ndaj tyre. Në një deklaratë, qeveria e kryeministrit Dritan Abazovi thotë se ka bërë “hapin e parë” në përputhjen me politikën e jashtme dhe të sigurisë të Bashkimit Evropian”. Edhe pse ka qënë prej vitesh një parajsë për jahtet, turistët dhe oligarkët nga Rusia, vendi fqinj përballet me një të ardhme të pasigurt. Fluksi i parave të pista nga Moska është ndalur dhe tani vendi fqinj është zotuar të ndjekë Bashkimin Europian në hakmarrjen ndaj Moskës. Pas pushtimit të Ukrainës nga presidenti rus Vladimir Putin në shkurt, Mali i Zi e ka gjetur veten përballë një nyjeje gordiane, pasi sanksionet kërcënojnë të përmbysin ekonominë e vendit. Çdo goditje mund të jetë e tmerrshme në vendin fqinj, sepse një e katërta e ekonomisë është e lidhur me sektorin turistik, që varet nga rusët për më shumë se një dekadë. Përgjatë shëtitores kryesore në Budva, rusishtja shpesh dëgjohet edhe më shumë se serbishtja dhe vija bregdetare e Malit të Zi është e mbushur me vilat dhe resortet në pronësi të oligarkëvë rusë. Për vite, hyrja pa viza dhe ligjet e dobëta të investimeve sollën një bum të parave nga Rusia drejt kombit ballkanik, duke bërë që oligakët rusë të investonin në pasuri të paluajtshme, që transformoi një pjesë të vijës së saj të bregdetare. Pamjet: AFP