Maduro hyri në sallën e gjyqit pak pas orës 12:00 sipas kohës lindore i veshur me rroba burgu, kufje për përkthime dhe këmbë të prangosura. Gruaja e tij kishte veshur të njëjtat rroba. Të dy duart e tyre ishin të çliruara ndërsa këmbët i kishte të lidhura. Maduro shtrëngoi duart me avokatin e tij, Barry Pollack, një avokat me përvojë në gjyqe i cili përfaqësoi themeluesin e ËikiLeaks, Julian Assange. Gjyqi zgjati rreth 30 minuta, ndërsa Nicolas Maduro u deklarua i pafajshëm. Ai i tha gjykatës se është "një njeri i mirë" ndërsa këmbënguli se është ende president i Venezuelës, duke shtuar se u "mor nga shtëpia e tij në Karakas". Cilia Flores, gruaja e tij, ndoqi po të njëjtin pretendim duke pretenduar pafajësi ndërsa theksoi se është ende Zonja e Parë e Venezuelës. Ndërkohë avokati mbrojtës më së shumti e lidhi rastin me paligjshëmrinë e kapjes së tij, se sa me akuzat e ngritura nga prokurorët. Ekipi mbrojtës nuyk kërkoi liri me kusht për Maduron, duke theskuar se do e bëj kërkesën në një moment më të përshtatshëm. “Arrestimi i tij natën në një vend të huaj nga forcat e rendit të SHBA-së është një "rrëmbim ushtarak" që shkel ligjin tha avokati. Nuk është hera e parë që një i pandehur ka ngritur këtë argument. Më shumë se tre dekada më parë, Manuel Noriega i Panamasë akuzoi SHBA-në për shkelje si të ligjit ndërkombëtar ashtu edhe të mbrojtjes së procesit të rregullt ligjor duke pushtuar Panamanë dhe duke e arrestuar atë jashtë vendit. Por ky argument nuk pati sukses, gjatë asaj kohe pasi gjykatat refuzuan të merrnin në konsideratë vetë ligjshmërinë e pushtimit të Panamasë dhe u përqendruan vetëm në akuzat në aktakuzën e Noriegës. Maduro akuzohet për narkoterrorizëm, komplot për importimin e kokainës, posedim të armëve dhe pajisjeve shkatërruese etj. Ai përballet me dekada burg e ndoshta edhe burg të përjetshëm për secilën akuzë nëse dënohet.