Tetëdhjetë vjet pas Luftës së Dytë Botërore, sondazhet tregojnë se shumë amerikanë dhe evropianë besojnë se një konflikt i tretë global edhe më shkatërrues mund të shpërthejë brenda një dekade, me tensionet me Rusinë që shihen si shkaku më i mundshëm. Ndërsa Evropa përgatitet të shënojë 80-vjetorin e Ditës së Fitores në Evropë, sondazhi i YouGov tregoi gjithashtu se shumica mendonin se ngjarjet gjatë dhe para Luftës së Dytë Botërore janë të rëndësishme edhe sot dhe duhet të vazhdojnë t'u mësohen brezave të rinj. Mes 41 dhe 55% e të anketuarve në pesë vende evropiane ku është kryer anketimi: Britania, Franca, Gjermania, Italia dhe Spanja, thanë se mendonin se një luftë tjetër botërore ishte shumë ose mjaft e mundshme brenda pesë deri në dhjetë vjetëve të ardhshëm, një pikëpamje kjo e ndarë nga 45% e amerikanëve. Shumica thanë se prisnin që çdo konflikt i ri të përfshinte armë bërthamore, dhe mes 57 dhe 73% thanë gjithashtu se një luftë e tretë botërore do të çonte në humbje më të mëdha jetësh sesa në vitet 1939-1945.