Tema dominuese në punimet e Asamblesë së Përgjithshme të Kombeve të Bashkuara është pa diskutim lufta në Gaza dhe rreziku i përshkallëzimit të mëtejshëm në Liban. Sekretari i Përgjithshëm i OKB-së, António Guterres paralajmëroi që në fillim të fjalimit të tij, për rrezikun e përhapjes masive të luftës në Lindjen e Mesme. Lufta e Gazës është një "makth i vazhdueshëm" dhe tani edhe Libani është në buzë të humnerës, tha ai. "Populli libanez, populli izraelit dhe njerëzit në mbarë botën nuk mund ta përballojnë që Libani të bëhet një Gazë e dytë," paralajmëroi ai. Guterres e dënoi edhe një herë sulmin e Hamasit më 7 tetor duke e quajtur atë "të neveritshëm". Dhe më pas, i shoqëruar nga duartrokitjet e shumë kryetarëve të shteteve dhe qeverive, shtoi se megjithatë "nuk ka asnjë justifikim për ndëshkimin kolektiv të popullit palestinez". Duke ju referuar luftërave të tjera në Ukrainë apo Sudan, Guterres foli për një "botë mosndëshkimi".