Dakordwsia e Kurtit dhe Vuçiçit në marrëveshjen për dokumentet e lëvizjes së lirë të qytetarëve, shënoi një gur të rëndësishëm në marrëdhënien mes Kosovës dhe Serbisë. Ecuria e dialogut mes dy vendeve, ka pasur dritëhijet e veta, ku nuk ka munguar asnjëherë ndërmjetësimi i Bashkimit Europian dhe Shteteve të Bashkuara të Amerikës. Reciprociteti është kërkuar me ngulm nga Kosova që prej shpalljes së pavarësisë, por është hasur me kundërshtimin e fortë të pales serbe. Në qershor të vitit 2020, qeveria e Kosovës shfuqizoi masat e reciprocitetit ndaj Serbisë, me qëllim që, t’i jepej shansi rinisjes së dialogut me Serbinë. Pas këtij vendimi, Shtetet e Bashkuara kërkuan që bisedimet të rinisnin sa më shpejt që të ishte e mundur. Dialogu vijoi në disa raunde takimesh mes Aleksandër Vuçiçit dhe Albin Kurtit, por pa arritur një dakordësi të qenësishme. Pak kohë më pas, Kryeministri i Kosovës, lajmëroi se në të gjithat pikat kufitare të Kosovës, automjetet me targa të Serbisë që hynin në territorin e Kosovës, duhet të pajiseshin me targa të përkohshme të Republikës së Kosovës. Kjo sipas tij vinte në kuadër të marrrëveshjes së lëvizjes së lirë të arritur mes Kosovës dhe Serbisë në 2011-ën. Autoritetet në Kosovë nisën aplikimin e masës së reciprocitetit për targat e automjeteve nga Serbia, duke thënë se një vendim i tillë nuk ishte ndërmarrë kundër serbëve, por ishte imponuar nga Serbia. 11 vite mw pas, pak orë para hyrjes në fuqi të vendimeve të qeverisë së Kosovës për reciprocitetin me targat me Serbinë në veri të Mitrovicës u aktivizuan sirenat e alarmit. Serbët në kufirin verior të Kosovës bllokuan me kamionë rrugën në afërsi të pikëkalimit kufitar të Jarinjës, që gjendet në Komunën e Leposaviqit. Kryeministri i Kosovës, Albin Kurti, deklaroi se ky vendim ishte një mënyrë për të mbrojtur serbët nga veprimet diskriminuese. Ambasadori i SHBA-së në Kosovë, Jeffrie Hovenier, kërkoi nga kryeministri i Kosovës shtytje të afatit të implementimi të dy vendimeve me 30 ditë. Ky afat mjaftoi që dy palët të uleshin në një tryezë të përbashkët bisedimesh, ku u arrit marrëveshja e parë, ajo për dokumentet e hyrje daljeve, teksa çështja e targave ka mbetur ende pezull.