Situata e sigurisë bërthamore në termocentralin e Zaporizhzhias në Ukrainën e pushtuar nga Rusia është duke u përkeqësuar, tha kreu i agjencisë bërthamore të OKB-së, pas një sulmi me dron pranë perimetrit të zonës. Rafael Grossi, kreu i Agjencisë Ndërkombëtare të Energjisë Atomike tha se ai mbetet "jashtëzakonisht i shqetësuar" dhe bëri thirrje për "vetëpërmbajtje maksimale nga të gjitha anët" për të mbrojtur termocentralin. Agjencia tha se sulmi i fundit ndodhi në një rrugë jashtë objektit, afër depozitave të ujit, dhe rreth 100 metra nga e vetmja linjë e mbetur e tensionit të lartë. Centrali u mor nën kontroll nga forcat ruse në fillim të luftës dhe është përballur me sulme të përsëritura për të cilat të dyja palët kanë fajësuar tjetrën. Javën e kaluar, Kievi dhe Moska shkëmbyen akuza pasi shpërtheu një zjarr në një nga kullat ftohëse të centralit. Agjencia bërthamore e OKB-së nuk tha se kush e kreu sulmin e së shtunës, por ekipi i saj i vendosur në Zaporizhzhia tha se dëmi dukej se ishte shkaktuar nga një dron i ngarkuar me eksploziv. Centrali nuk ka prodhuar energji për më shumë se dy vjet dhe të gjashtë reaktorët janë mbyllur që nga prilli.