Në tre mujorin prill maj qershor, në të gjithë vendin u miratuan gjithësej 509 leje ndërtimi të reja, nga 339 të tilla që ishin në të njëjtën periudhë të njhë viti më parë, duke shënuar një rritje me 50.1 përqind. Të dhënat u bënë publike nga Instituti i Statistikave, e cila thotë se nga ky numër 429 ishin ndërtime të llojit banesë, ndërsa pjesa tjetër përfshinë hotele, zyra, ndërtesa industrial etj. Qarku me numrin më të lartë për leje ndërtimi të reja rezulton Berati me 138 të tilla, ndërsa qarku me numrin më të ulët është Kukësi me vetëm 3 leje të reja ndërtimi. Gjatë tre mujorit të dytë, sipërqafa e lejeve të ndërtimit, ishte 652.136 m 2 , nga 661.945 m 2 miratuar në tremujorin e dytë të një viti më parë, duke shënuar një ulje prej 1,5 %. Nga ana tjetër, vlera e përafërt e lejeve të ndërtimit miratuar për ndërtesa dhe punime inxhinierike po në të njëjtën periudhë është 24,4 miliardë lekë, nga 25,9 miliardë lekë miratuar në tremujorin e dytë 2022, duke shënuar një ulje prej 5,8 %.