Kuvendi i Maqedonisë së Veriut miratoi të premten në mesnatë masat për përballje me krizën ekonomike, ligjin për uljen e akcizës për karburantet që merr shteti nga shitja e karburanteve, si dhe ligjin për uljen e Tatimit mbi Vlerën e Shtuar për karburantet, nga 18 në 10 për qind. Është miratuar edhe ligji për uljen e TVSH-së për ushqimet bazë në 0 për qind. Ligjet janë miratuar me 95 vota nga deputetët e të gjitha partive politike. Një litër naftë në Maqedoninë e Veriut të premten është shitur për 97 denarë ose 1 euro e 57 cent ndërsa benzina për 93 denarë , 1 euro e 51 cent. Për herë të parë çmimi i naftës ka kaluar atë të benzinës. Çmimi i tyre pritet të ulet për 10 denarë (0.16 cent) me miratimin e ligjeve dhe publikimit të tyre në Gazetën Zyrtare. Masat parashikojnë mbajtjen nën kontroll edhe të çmimit të energjisë elektrike dhe të ngrohjes qendrore si dhe heqjen e TVSH-së për të gjitha produktet ushqimore bazë. Qeveria e Maqedonisë së Veriut, të premten vendosi të ndalonte për dhjetë ditë eksportin e disa mallrave të caktuara ushqimore. Vendimi përfshin eksportin e grurit, elbit, misrit, miellit, farave të lulediellit, si dhe vajrave.