Gjykata Kushtetuese pritet që të vendosë këtë të enjte rreth kërkesës së Kryeministrisë në lidhje me masat e sigurisë të vendosura nga gjykata e posaçme ndaj zv.Kryeministres, Belinda Balluku. Kryeministri Edi Rama i ka konsideruar masat e sigurisë të vendosura nga gjykata e posaçme ndaj zëvendëses së tij si ndërhyrje brutale te kompetencat e qeverisë dhe procesin gjyqësor në Kushtetuese si betejë për pavarësinë e pushtetit ekzekutiv. Më 12 dhjetor, Gjykata Kushtetuese pezulloi pezullimin nga detyra të Belinda Ballukut dhe vendosi me shumicë votash që të kalojë çështjen për shqyrtim në seancë plenare. Sipas vendimit të Kushtetueses, pezullimi nga detyra i një anëtari të qeverisë, është cilësuar si një akt që cenon garancinë e imunitetit të anëtarit të Këshillit të Ministrave, parimin e ndarjes së pushteteve dhe kompetencat e organeve.