Katër persona të afërm me njëri tjetrin, dy prej tyre babë e birë u vendosën në pranga nga policia e Lushnjes pasi u kapën duke kultivuar bimë narkotike të llojit kanabis. Hyqmet Gjolena 61 vjec, Mariglen Gjolena 34 vjec babë e birë, Fitim Gjolena 24 vjec dhe Ervin Gjolena 31 vjec, janë personat që u vendosën në pranga në kuadër të operacionit të koduar Lidhja. Katër të afërmit kishin kultivuar një sasi lënde narkotike në fshatin Murrizë të Lushnjes. Gjatë kontrolleve në territorin e këtij fshati, në një pronë publike, u gjetën të kultivuara 87 bimë narkotike cannabis sativa, të cilat në përfundim të veprimeve procedurale, u asgjësuan nëpërmjet djegies. Arrestimi i katër personave erdhi si pasojë e informacioneve të siguruara nga inteligjenca policore në bashkëpunim me Prokurorinë e Fierit. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.