Japonia ndërmori hapin e fundit për të lejuar që centrali bërthamor më i madh në botë të rifillojë operacionet me një votim rajonal të hënën, një moment vendimtar në kthimin e vendit në energjinë bërthamore gati 15 vjet pas katastrofës së Fukushimës. Kashivazaki-Kariva, i vendosur rreth 220 km në veriperëndim të Tokios, ishte midis 54 reaktorëve të mbyllur pasi tërmeti dhe cunami i vitit 2011 shkatërruan centralin Fukushima Daiichi në katastrofën më të rëndë bërthamore që nga Çernobili. Që atëherë, Japonia ka rindezur 14 nga 33 reaktorët që mbeten në funksionim, ndërsa përpiqet të shkëputet nga lëndët djegëse fosile të importuara. Kashivazaki-Kariva do të jetë i pari që do të operohet nga Tokyo Electric Poëer Co, e cila drejtoi centralin e dëmtuar të Fukushimës. Të hënën, asambleja e prefekturës Niigata miratoi rinisjen e punës muajin e kaluar, duke lejuar në mënyrë efektive që termocentrali të rindizet. "Ky është një moment historik, por ky nuk është fundi", thanë zyrtarët lokalë para gazetarëve pas votimit. "Nuk ka fund për sa i përket garantimit të sigurisë së banorëve të Niigatës". Ndërsa ligjvënësit votuan në mbështetje të nismës, seanca e asamblesë, e fundit për këtë vit, ekspozoi përçarjet e komunitetit mbi rindezjen, pavarësisht vendeve të reja të punës dhe faturave potencialisht më të ulëta të energjisë elektrike.