Policia e Tiranës ka zbuluar korrupsionin e kryer nga tre zyrtarët të Agjencisë së Barnave, të cilët merrnin rryshfet për të mos vendosur gjoba subjekteve ku gjenin shkelje. Në pranga kanë përfunduar Besiana Xhelilaj, përgjegjëse e Agjencisë dhe Luan Çiçi specialist, ndërsa u shpall në kërkim një tjetër specialist me inicialet A.L., 28-vjeç. Specialistët e Seksionit për Hetimin e Krimeve Ekonomike dhe Financiare, në bashkëpunim me Prokurorinë pranë Gjykatës së Rrethit Gjyqësor Tiranë, si rezultat i një hetimi disamujor, organizuan dhe finalizuan operacionin policor të koduar "Farmacisti". Hetimet kanë zbuluar se këta shtetas, në cilësinë e punonjësve të Agjencisë së Barnave, ushtronin kontrolle në subjekte të ndryshme farmaceutike dhe duke shpërdoruar detyrën, merrnin shuma parash, për të mos raportuar shkeljet ligjore që kryheshin nga këto subjekte.