Imazhet e publikuara nga media shtetërore e Koresë së Veriut më 31 korrik tregojnë liderin e vendit Kim Jong Un duke hipur në një gomone për të parë nga afër përmbytjet e shkaktuara nga shirat rekord, në qytetin Sinuiju në provincën e Pjongan-it. Agjencia Qendrore Koreane e Lajmeve më herët raportoi se lideri Kim Jong Un po e ndiqte nga afër situatën dhe se kishte urdhëruar angazhimin e ushtrisë në operacionet e shpëtimit, përfshirë edhe 10 helikopterë dhe anije shpëtimi të marinës. Kim, sipas KCNA, kritikoi zyrtarët për dështimin e tyre për t'u përgatitur përballë një rreziku të tillë, pavarësisht urdhrave të mëparshme për të forcuar masat kundër fatkeqësive natyrore. Koreja e Veriut ka parë reshje rekord shiu në korrik, dhe në një ditë të vetme qyteti Kaesong regjistroi 463 mm shi. Administrata meteorologjike e Koresë së Jugut tha se kjo ishte sasia më e lartë e shiut e regjistruar në Veri në 29 vjet. Fatkeqësitë natyrore priren të kenë një ndikim më të madh në veriun e izoluar dhe të varfër për shkak të infrastrukturës së tij të dobët, ndërsa shpyllëzimi e ka lënë atë të pambrojtur ndaj përmbytjeve. Veriu ka tentuar të parandalojë përmbytjet, duke hapur një digë pranë kufirit ndër-korean, cka edhe ngriti shqetësime për përmbytje në jug.