Lideri i Koresë së Veriut, Kim Jong Un, është zotuar për thellim të raporteve me Rusinë, ndërsa ai u takua me shefin e sigurisë Sergei Shoigu, raportoi media shtetërore koreanoveriore. Fuqitë perëndimore kanë akuzuar Korenë e Veriut se po i shet municione Rusisë në shkelje të sanksioneve, ndërsa Moska po vazhdon luftën kundër Ukrainës të nisur mbi 30 muaj më parë. Koreja e Veriut së fundi ka forcuar lidhjet e saj ushtarake me Rusinë, ndërsa presidenti rus, Vladimir Putin, zhvilloi një vizitë të rrallë në Phenian në qershor, kur firmosi një marrëveshje të përbashkët për mbrojtjen me Kim Jong un. Foto të publikuara nga media shtetërore koreanoveriore treguan Kim Jong un dhe Shoigu duke u përqafuar dhe duke buzëqeshur pas përfundimit të takimit të tyre. Dy zyrtarët i përshkruan bisedimet si “konstruktive” dhe “miqësore”. Vendndodhja e saktë e mbajtjes së këtij takimi nuk është zbuluar, por ekspertët dyshojnë se ata janë takuar në Pallatin Kumsusan në Phenian, ku u prit edhe Putini si dhe lideri kinez, Xi Jinping.