Shërbimet e Komisariatit të Policisë Krujë kanë goditur një rast të veprimtarisë kriminale të kultivimit të bimëve narkotike në fshatin Borizanë. Sipas uniformave blu, falë operacionit të koduar ‘Koordinata’, janë gjetur dhe asgjësuar 212 fidanë narkotikë cannabis sativa. Policia bën me dije se falë përdorimit të dronit, janë arrestuar 2 autorët e dyshuar të këtij rasti, të cilët u kapën në flagrancë në vendin ku kishin mbjellë fidanët. Sipas uniformave blu, shtetasit 25 dhe 21 vjeç ishin kushërinj dhe banonin në fshatin Borizanë. Në cilësinë e provës materiale u sekuestruan një pjesë e vogël e fidanëve narkotikë, një sasi e vogël kanabisi, 1 aparat celular dhe automjeti që këta shtetas përdornin për të shkuar në vendin ku kishin kultivuar fidanët narkotikë. Policia njofton se kontrollet do të vijojnë në të gjithë territorin e rrethit Krujë. Materialet procedurale i kaluan Prokurorisë, për veprime të mëtejshme.