Ende pa u çelur sesioni parlamentar, deputetëve u ka mbërritur një kërkesë zyrtare nga Konfidustria, lidhur me shtrenjtimin e çmimit të tregtimit të naftës, e cila aktualisht, sipas vendimit të fundit të Bordit shitet me 248 lekë për litër. Në njoftimin zyrtar, konfidustria kërkon mbledhjen e jashtëzakonshme të Kuvendit të Shqipërisë me qëllim ngritjen e Entit Rregullator të Karburanteve si dhe shpërndarjen e Bordit të Trasparencës. “Konfindustria rikërkon nga deputetët e të gjitha partive pa dallim, që në sesionin e jashtëzakonshëm të Kuvendit, të marrin nismën ligjore për themelimin e Entit Rregullator të Karburanteve, si agjenci e përhershme, profesionale, në varësi të Kuvendit dhe sipas modeleve të suksesshme të rajonit. Bordi i Trasparencës është ndërtuar dhe funksionon në kushtet e konfliktit të pastër dhe flagrant me interesin publik. Gjysma e antarëve të tij, që furnizojnë me të dhëna dhe janë pjesë e vendimarrjes, përfaqësojnë pikërisht kompanitë, që duhet të jenë subjekt i vëzhgimit për spekullime në treg.” - thuhet në njoftimin zyrtar.