Hakerët kinezë kanë carë sigurinë kompjuterike të Departamentit amerikan të Thesarit këtë muaj dhe vodhën dokumente në atë që Thesari e quajti një "incident i madh", sipas një letre drejtuar ligjvënësve që zyrtarët e Thesarit i treguan agjencisë së lajmeve Reuters. Hakerët komprometuan ofruesin e shërbimit të sigurisë kibernetike të palëve të treta BeyondTrust dhe ishin në gjendje të aksesonin dokumente të paklasifikuara, thuhej në letër. Sipas letrës, hakerët "fituan akses në një çelës të përdorur nga shitësi për të siguruar një shërbim të bazuar në klaudin kompjuterik të përdorur për të ofruar mbështetje teknike nga distanca për përdoruesit në Zyrat e Departamentit të Thesarit. Me akses në çelësin e vjedhur, aktori i kërcënimit ishte në gjendje të anashkalojë sigurinë e shërbimit, të aksesojë nga distanca në disa stacione të përdoruesve të thesarit dhe të sigurojë disa dokumente të paklasifikuara të mbajtura nga këta përdorues”. Departamenti i Thesarit tha se ishte paralajmëruar për shkeljen nga BeyondTrust më 8 dhjetor dhe se po punonte me Agjencinë e Sigurisë Kibernetike dhe Sigurisë së Infrastrukturës së SHBA dhe FBI-në për të vlerësuar ndikimin e hakerimit. Zyrtarët e Thesarit nuk iu përgjigjën menjëherë një emaili që kërkonte detaje të mëtejshme rreth hakimit. FBI po ashtu nuk iu përgjigj menjëherë kërkesave të Reuters për koment.