Ministria e Mbrojtjes e Kinës tha se ka refuzuar një telefonatë nga Sekretari i Mbrojtjes i Shteteve të Bashkuara të Amerikës, Lloyd Austin, pas rrëzimit të balonës së pretendruar spiune kineze, duke thënë se SHBA-të “nuk kanë krijuar atmosferë të duhur për dialog”. Veprimi i SHBA-së “ka shkelur seriozisht normat ndërkombëtare dhe ka krijuar një precedent shkatërrues", tha zëdhënësi i ministrisë kineze. “Duke pasur parasysh se ky qëndrim i papërgjegshëm dhe seriozisht i gabuar i shteteve të bashkuara nuk krijoi atmosferën e duhur për dialog dhe shkëmbim informacioni mes dy ushtrive, Kina nuk e pranoi propozimin e SHBA-së për bisedime mes dy ministrave të mbrojtjes”, tha ai duke shtuar se Kina rezervon të drejtën për të përdorur mjetet e nevojshme me qëllim që të trajtojë situata të ngjashme ". Shtetet e Bashkuara rrëzuan atë që Uashingtoni tha se ishte një balonë kineze spiunazhi, por që Pekini tha se ishte një mjet shkencor dhe civil, që aksidentalisht kishte fluturuar mbi SHBA, pasi kishte dalë nga kontrolli për shkak të kushteve të këqia të motit. Pasi shprehu fillimisht “keqardhje” për incidentin, retorika e Kinës u ashpërsua ditët e fundit pasi Byroja Federale e Hetimit mblodhi mbeturinat nga vendi i rrëzimit në ujërat territoriale të SHBA-së në brigjet e Karolinës së Jugut dhe i dërgoi ato në laboratorin e FBI-së në Virxhinia