Ministri i Punëve të Jashtme i Serbisë, Ivica Daçiç, tha se detyrë e KFOR-it është të ndalë aktet e njëanshme të Prishtinës, e jo të pengojë punonjësit të hyjnë në ndërtesat komunale. “Tani po i ruajnë kryetarët me pretekstin e ruajtjes së paqes. Duket se po i ruajnë nga pronarët e objekteve, serbët, nga ata që punojnë atje, që janë të punësuar atje. Shqiptarët nuk mund të jenë kryetarë në komunat serbe, ku serbët nuk i kanë zgjedhur”, tha Daçiç. Ai shtoi se forcat e armatosura të Serbisë janë në gjendje gatishmërie. Autoritetet serbe kanë vendosur që forcat e tyre të armatosura të mbeten në nivelin më të lartë të gatishmërisë deri në një njoftim të radhës, për shkak të situatës në veri të Kosovës. Këtë mëngjes, grupe serbësh lokalë protestuan sërish në veri duke kundërshtuar kryetarët e rinj shqiptarë të Leposaviçit, Zubin Potokut dhe Zveçanit. Atje ishte edhe kryetari i Listës Serb, Goran Rakiq, i cili i kërkoi ushtarëve të KOFR-it që të largojnë Policët e Kosovës, gjë që u refuzua. Përveç pjesëtarëve të Policisë së Kosovës, në veri ka prezencë të shtuar të pjesëtarëve të misionit të NATO-s në Kosovë, KFOR. Të premten, serbët e veriut u përballën me Policinë e Kosovës në Zvecan, ku pati edhe të shtëna armësh, gaz lotsjellës dhe bomba shokuese, pasi kjo e fundit po ndihmonte kryetarët e rinj të hynin në zyrat komunale. Hyrja e tyre në ndërtesat komunale nga faktori ndërkombëtar u cilësua si “hyrje me forcë” dhe nga Qeveria e Kosovës u kërkua që të mos ndërmarrë “hapa të njëanshëm dhe destabilizues”.