Arben Meskuti e humbi sërish shpresën për të qenë i lirë, pasi Gjykata e Posaccme antikorrupsion ia rrëzoi edhe njëherë kërkesën për revokimin e masës së sigurisë ‘arrest në burg’. Teksa mbahet në paraburgim për dosjen e mikrokredive, hetime të cilat u zgjatën me dy muaj me kërkesë të prokurorit Elvin Gokaj, Meskuti ka kërkuar disa herë të dalë nga qelia. Por, vendimi i gjyqtarit Erjon Bani, mbetet i njëjtë prej fillimisht, miratim i masës ‘arrest në burg’. Në sallën e gjyqit, mbrojtësi ligjor i Meskutit kërkoi revokimin e masës caktuar ndaj tij në 21 maj të vitit të shkuar, ose zëvendësimin me një ose më shumë masa të tjera ose me “Garanci pasurore”. Gjykata rrëzoi kërkesën e tij si të pabazuar në ligj dhe prova. Por kjo nuk ishte kërkesa e vetme e Arben Meskutit. Ai po ashtu kundërshtoi vendimin e IEVP Mine Peza, sa i përket refuzimit të kërkesës së tij për leje të vecantë. Për këtë pikë, Erjon Bani shpalli moskopmpencë dhe ia referoi aktet Gjykatës së Shkallës së Parë të Juridiksionit të Përgjithshëm Tiranë.