Policia ka dhënë detaje për ngjarjen e ndodhur mbrëmjen e së hënës në Tropojë. Një 49 vjeçar ka plagosur me armë zjarri në këmbë një 28 vjeçar, pas një konflikti për motive të dobëta në një lokal në qytet. Ndërkohë i plagosur ka mbetur edhe një kalimtar i rastit, i cili ndodhet jashtë rrezikut për jetën. Policia është vënë në ndjekje të autorit të identifikuar. Për këtë arsye është rrethuar zona ndërkohë që vijojnë kontrollet nëpër ambiente të ndryshme për të bërë të mundur kapjen e tij. "Rreth orës 20:10, në Bajram Curri, në oborrin e një lokali, dyshohet se pas një konflikti për motive të dobëta, shtetasi B. S., 49 vjeç, ka plagosur me armë zjarri pistoletë, në këmbë, shtetasin A. B., 28 vjeç. Si pasojë e të shtënave, është plagosur në këmbë dhe është jashtë rrezikut për jetën, edhe një kalimtar i rastit, shtetasi G. P., 32 vjeç", njoftoi policia. Grupi hetimor ka sekuestruar kamerat e sigurisë dhe çdo provë tjetër që do t'i shërbejë dokumentimit të plotë të ngjarjes.