Gjykata e Lartë i konsideron kërcënimet ndaj gjyqtarëve dhe prokurorëve si kërcënim për të gjithë shoqërinë shqiptare. Përmes një deklarate, gjykata kërkon që të zbatohet me korrektësi dhe përgjegjshmëri çdo dispozitë ligjore që ka të bëjë me mbrojtjen dhe garantimin e jetës së magjistratëve dhe familjarëve të tyre. “Presionet apo kërcënimet e çfarëdolloji ndaj magjistratëve përbëjnë shqetësim serioz jo vetëm për ta, por për të gjithë shoqërinë shqiptare, e cila është e interesuar për mbrojtjen e të drejtave dhe sigurinë e jetës së çdo individi, si dhe funksionimin normal të shtetit të së drejtës”, thuhet në reagim. Gjyqtarët e Gjykatës së Lartë mirëpresin zbatimin me korrektësi dhe përgjegjshmëri të dispozitave ligjore për mbrojtjen dhe garantimin e jetës, shëndetit dhe integritetit të magjistratëve. Opinioni publik dhe organet kompetente duhet ta kenë të qartë se, gjykatat dhe prokuroritë janë institucione në shërbim të qytetarëve dhe të shoqërisë dhe se çdo tentativë për cenim të integritetit fizik e moral të tyre, ndikon drejtpërdrejtë në pavarësinë e sistemit në përgjithësi dhe atë individuale, të magjistratit në veçanti, vijon deklarata.