Top News – Kapet vrasësi i efektivit të policies / 21 vjeçari është vetëplagosur, në gjendje kritike

Pas operacionit të kërkimit dhe krehjes së zonës në kënetën e Vainit, policia ka prangosur rreth orës 16 të së martës autorin e vrasjës së efektivit të policisë Saimir Hoxha. Forcat e Reneas dhe te FNSH e gjetën 21 vjeçarin Aldi Rama të fshehur dhe të vetëplagosur me armën e zjarrit që mbante me vete. Pasi u gjet i vetëplagosur dhe në gjendje kritike për jetën, 21 vjeçari që vrau me plumb në zemër efektivin e antikrimit Saimir Hoxha, është dërguar në spital ku i është nënshtruar trajtimit mjekësor. Arrestimi i autorit të vrasjes së policit 44 vjecar u bë pas lokalizimit të vendit ku ai ishte fshehur dhe rrethimit të perimetrit ku ai ndodhej. Policia i ka bërë thirrje disa herë të dorëzohej 21 vjecarit Aldi Rama, por ai në disa raste qëlloi në drejtim të tyre dhe më pas ka tentuar edhe të vetëvritet. Për kapjen e tij kërkimet vazhduan në mënyrë intensive nga ajri me helikopter, dhe nga toka duke bërë krehjen e zonës ku dyshohej se i fshihej. Në vendin ku u gjet i vetëplagosur policia ka gjetur dhe ka sekuestruar armën e krimit dhe telefonin e tij celular. Më herët policia vuri shpërblim 20 mijë euro për këdo që do të informonte për vendodndhjen e autorit të vrasjes së policit 44 vjecar Saimir Hoxha. Sipas informacioneve të policisë vrasja e Saimir Hoxhës ka ndodhur në një postbllok të ngritur nga policia në Ishull Lezhë. Policia ka vënë re një makinë të dyshimtë dhe i ka kërkuar që të ndalonte. Ndërsa oficeri Saimir Hoxha ka shkuar për ta pyetur e kërkuar dokumentacionin e nevojshëm, i riu ka nxjerrë pistoletën dhe e ka qëlluar për vdekje. Më pas autori është larguar me makinën, por rreth 3 minuta larg vendit të ngjarjes është gjetur mjeti i tij. Kjo ka krijuar dyshimet se autori është larguar në këmbë.