Ka përfunduar numërimi i votave për kandidatët e grupit të rithemelimit të partisë demokratike për zgjedhjet e pjesshme të 6 marsit për gjashtë bashkitë pa kryetar, konkretisht të bashkive Vorë, Rrogozhinë, Lushnje, Durrës, Shkodër e Dibër. Në Bashkinë Vorë kandidat është përzgjedhur Lulzim Vrana me profesion ekonomist me 277 vota. Në bashkinë e Lushnjes kandidat u përzgjodh Elton Bano me profesion avokat me 671 vota. Ardian Muka me profesion inxhinier urbanist, fitoi me 1 mijë e 162 vota, përballë Silvja Gjepalit në Durrës. Pas zyrtarizmit, Muka u shpreh se tashmë ka ardhur koha që Durrësi të bëjë ndryshimin e madh. Hekuran Xhani do të jetë kandidat i kësaj force politike për bashkinë e Rrogozhinës, ndërsa u votua me 211 vota. Në Dibër Premtim Kryemadhi do të jetë kandidati i Komisionit të Rithemelimit të PD në zgjedhjet lokale të 6 marsit. Pas votimit në primaret e kësaj të diele, Kryemadhi mori 424 vota, Dafina Muda 121 vota, ndërsa Behar Dema 158 vota. Në total, në këtë bashki votuan 713 persona, ku 10 vota u shpallën të pavlefshme. Bardh Spahia u zgjodh si kandidat për bashkinë e Shkodrës me 229 vota.