Kryeministri Edi Rama iu rikthye çështjes së drejtësisë në rubrikën e radhës ‘Sy m’Sy’ me ndjekësit e tij në rrjetet sociale. Kreu i Qeverisë, duke iu referuar prokurorisë dhe gjykatës së posaçme tha se ato janë sot të pavarura, por jo profesionale. rama - Ka pasur momente që jemi skandalizuar por ama kemi shtrënguar dhëmbët, kemi qepur gojën dhe kemi thënë: drejtësia të vazhdojë punën e vet, pse? Sepse janë institucione që sapo krijuam, nuk kanë ardhur nga hëna, nuk kanë rënë nga qielli. Kanë nevojë për kohën e tyre. do të bëjnë gabimet e tyre, fatkeqësia është që gabimet e tyre nuk janë si gabimet e ndërmarrjes së gjelbërimit, por janë gabime që kushtojnë jetë njerëzish, kushtojnë trauma dhe kushtojnë plagë psikologjike, nganjëherë të pariparueshme. Mirëpo nga ana tjetër, cila është alternativa? Nuk ka alternativë tjetër, përveç një drejtësisë të pavarur profesionale dhe që respekton me integritet liritë dhe të drejtat e njeriut. Të pavarurën e kemi tanimë para syve, profesionalen duhet të luftojmë të gjithë së bashku që ta konsolidojmë dhe nga ana tjetër, respektimi i standardeve demokratike i një drejtësie europiane që nuk mund të justifikojë qasje dhe metoda të sigurimit të shtetit është një tjetër betejë për t’u bërë, por ama në mënyrë konstruktive. Kryeministri këshilloi SPAK dhe Prokurorinë e Përgjithshme që të mos vëzhgojnë partitë politike në fushata.