Nga data 29 shtator deri më 2 tetor Shqipëria mirëpret Javën Kulturore Hungareze. Aktivitetet do të shpalosin një mozaik të pasur me ngjarje që ndërthurin artin, sportin, modën, historinë dhe gastronominë. Java nis me prezantimin e sportit Teqball, i shpikur në Hungari në vitin 2014, një ndërthurje mes futbollit dhe tenisit të tavolinës, i luajtur mbi një tavolinë të lakuar. Aktivitetet zhvillohen në Shkollën e biçikletave dhe në Parkun e Madh të Liqenit në Tiranë, ku do të dorëzohen dy tavolina Teqball si dhuratë. Në 30 shtator, vëmendja zhvendoset te figura e Mbretëreshës Geraldinë, ku do të dorëzohet një vepër arti e realizuar nga artistja hungareze Anna Konya, si homazh për trashëgiminë humane dhe shpirtërore të Mbretëreshës. Ceremonia përfshin edhe shpërndarjen e çmimeve të konkursit të vizatimeve për fëmijë.