Jahti luksoz "Abeona" i miliarderit Jeff Bezos, është ankoruar këtë të premte për furnizim në portin e Durrësit. Pagëzuar me emrin e perëndeshës romake Abeona, mbrojtëse e udhëtarëve dhe fëmijëve në udhëtime të gjata, jahti luksoz është ankoruar në port dhe pritet të furnizohet me rreth 95 mijë litra karburant por dhe gjëra të tjera. Jahti po lëviz në zonë dhe më pas do të ndalojë në Venecia ku pritet të bëhet dasma e Bezos. I lançuar në vitin 2023 nga kompania prestigjioze holandeze Damen Yachting, “Abeona” përfaqëson standardet më të larta të ndërtimit detar, me një superstrukturë alumini prej 76 metrash të gjatë dhe gjerësi 12 metra, ky jaht është projektuar për lundrime të gjata e të sigurta. Jahti lundron nën flamurin e Ishujve Kajman.