Gjatë natës reshjet e borës kanë vazhduar pothuajse në të gjithë territorin, shoqëruar edhe me erëra të forta e temperatura shumë të ulëta. Problematika kryesore është rruga Milot–Lezhë, e cila ka pasur borë shoqëruar me erëra shumë të forta, është punuar gjatë gjithë natës. Aksi është i kalueshëm, përveçse një pjesë në kryqëzimin e Tales, ku kalimi realizohet me një korsi dhe po menaxhohet trafiku. Është punuar pa ndërprerje për pastrim e kriposje. Sipas autoritetit rrugor shqiptar, akset rrugore ku qarkullimi bëhet me zinxhirë janë Sopot – Qafë Luzhë, B. Curri Valbonë, Krumë-Kukës-Ura e Zapodit, Kukës-Bushtricë, Peshkopi-Qafë Drajë, Peshkopi-Ushtelencë, Qafë Bualli-Krastë, por edhe në Qafë Mali-Fierzë. Ndërsa në rajonin qëndror të vendit, qarkullohen me zixhirë akset Krujë-Sari Salltik, në segmentet e Dajtit, në Prrenjas-Qafë Plloçë, në Rrugën e Stëblevës. Në jug të vendit, qarkullohet, me goma dimërore ose zinxhirë. Kontraktorët janë në terren për pastrimin e akseve dhe shpërndarjen e kripës. Të gjithë drejtusit e mjeteve të lëvizin vetëm me goma dimri ose zinxhirë, të reduktojnë shpejtësinë, të respektojnë sinjalistikën rrugore dhe udhëzimet e Policisë Rrugore.