Ushtria izraelite urdhëroi civilët që të evakuohen përkohësisht nga një pjesë e zonës humanitare në Gazën jugore, përpara, siç tha ajo, një “operacioni të dhunshëm” kundër grupeve të armatosura palestineze. Ushtria tha se ka pasur “aktivitete të shumta terroriste dhe lëshime raketash” nga lagjet lindore të qytetit Khan Junis, dhe u kërkoi banorëve të zhvendoseshin në zonën humanitare al-Mavasi. Palestinezët raportuan se njoftimi u pasua me sulme intensive ajrore nga Izraeli në dhe rreth Khan Junisit. Ministria e Shëndetësisë në gaza tha se të paktën 14 persona, përfshirë gjashtë fëmijë dhe katër gra, u vranë. Ajo, gjithashtu, u bëri thirrje banorëve që të dhurojnë gjak në spitalin Naser, në perëndim të Khan Junisit, për të ndihmuar në trajtimin e numrit të lartë të pacientëve. Sipas autoriteteve në Gazë, mbi 39.000 njerëz janë vrarë që nga fillimi i luftës. Në dy javët e fundit, Izraeli ka kryer disa sulme vdekjeprurëse në zonat humanitare, për të cilat ka thënë se kanë pasur në shënjestër luftëtarët palestinezë që veprojnë atje. Më 13 korrik, Ministria e Shëndetësisë në Gaza tha se më shumë se 90 njerëz janë vrarë në një sulm izraelit në zonën humanitare al-Mavasi.