Ministria e Shëndetësisë në Liban tha se bombardimet e ushtrisë izraelite nëpër Liban të hënën kanë vrarë 100 persona dhe kanë plagosur 400 të tjerë. Ministria tha se mes të vrarëve dhe të plagosurve ka gra dhe fëmijë. Ushtria izraelite kreu sulme ajrore në jug dhe verilindje të Libanit të hënën në mëngjes. Ajo tha se goditi 300 shënjestra në Liban, në përpjekje për të rritur presionin mbi Hezbollahun. Ushtria njoftoi për bombardimet e reja përmes një postimi në rrjetin social X, ku postoi një foto të shefit ushtarak, gjenerallejtnantit, Herzi Halevi, duke urdhëruar sulme shtesë nga shtabi i ushtrisë në Tel Aviv. Këto janë bombardimet më të ashpra të Izraelit në Liban që kur nisën luftimet mes tij dhe Hezbollahut tetorin e kaluar. Halevi dhe liderë të tjerë izraelitë janë zotuar për veprime më të ashpra ndaj Hezbollahut në ditët e ardhshme. Ndërsa ushtria izraelite kreu sulmet, autoritetet izraelite raportuan për një sërë sirenash në veri të Izraelit, duke paralajmëruar banorët për sulme me raketa nga Libani. Të hënën në mëngjes, Izraeli u bëri thirrje banorëve në jug të Libanit të largohen nga shtëpitë e tyre në pjesët ku tha se Hezbollahut ruan armë, duke i paralajmëruar për “bombardime të ashpra” atje.