Izraeli tha të martën se forcat e tij kishin sulmuar anëtarët e hamasit brenda rrjetit të gjerë të tuneleve nën gaza ndërsa forcat tokësore hynë më thellë brenda enklavës, duke përparuar me tanke dhe autoblinda drejt qytetit kryesor të këtij territori, si dhe duke liruar një ushtare që mbahej e burgosur nga militantët e Hamasit. Kryeministri izraelit refuzoi thirrjet për armëpushim, ndërsa sulmet ajrore godisnin pranë spitaleve ku mijëra palestinezë janë strehuar së bashku me të plagosurit. Ushtria izraelite tha se një ushtare e kapur gjatë sulmit brutal të Hamasit më 7 tetor, u shpëtua në Gazë. Ky është rasti i parë i clirimit të një pengu që kur filloi lufta një javë më parë. Zyrtarët ushtarakë nuk dhanë shumë detaje, por njoftuan nëpërmjet një deklarate se ushtarja Ori Megidish ishte mirë dhe se ishte takuar me familjen e saj. Kryeministri Benjamin Netanyahu e mirëpriti atë në atdhe, duke thënë se kjo arritje e forcave izraelite të sigurisë “dëshmon për angazhimin tonë për të liruar të gjitha pengjet”.