Izraeli ka kryer bombardimet më vdekjeprurëse në Liban që nga konflikti shkatërrues pesëjavor që kishte zhvilluar me Hezbollahun më 2006. Sulmet e 23-24 shtatorit, që kanë vrarë qindra njerëz, shënojnë një luftë të re mes Izraelit dhe armikut të tij të hershëm, Hezbollahut, thanë ekspertët. Palët vazhdimisht kanë këmbyer zjarr ndërkufitar që kur Izraeli nisi luftën në Rripin e Gazës në tetor. Hezbollahu ka thënë se ka gjuajtur raketa në Izrael në shenjë solidariteti me palestinezët. Por, sulmet ajrore vdekjeprurëse të Izraelit, që u kryen pak pasi në Liban u shënjestruan pajisje të komunikimit, sulme për të cilat u fajësua Izraeli, tregojnë shpërthimin e një konflikti të ri. “Të dyja palët mund ta përshkallëzojnë situatën edhe më shumë, por ne jemi aktualisht në një nivel të dhunës që është i barasvlershëm me Luftën e Dytë Libaneze” më 2006, thotë Michael Horoëitz, kreu i inteligjencës në firmën konsulente Le Beck International, me seli në Bahrejn. Dallimi mes të konfliktit të vazhdueshëm dhe një lufte në shkallë të plotë “është bërë aq i ngushtë, saqë është pothuajse i papërfillshëm”, shton Horoëitz.