Qeveria e emergjencës në Izrael ka miratuar një amendim të buxhetit për vitin 2024, i cili shton 55 miliardë shekelë, ose 15 miliardë dollarë, në shpenzimet e mbrojtjes. Paketa e miratuar një ditë më parë përfshin gjithashtu fonde për dëmshpërblimin e të prekurve drejtpërsëdrejti apo tërthorazi nga operacionet kundër Hamasit në Rripin e Gazës, si dhe fonde shtesë për shëndetin, policinë, mirëqenien dhe arsimin. "Ne kemi ndryshuar prioritetet tona, në mënyrë që çdo rezervist, çdo luftëtar dhe familjet e tyre të dinë se ka një qeveri që i mbështet dhe që kujdeset për ta," tha Ministri izraelit i Financave. Në total, në vitin 2024 Izraeli do të shpenzojë 582 miliardë shekelë ose rreth 154 miliardë dollarë, 70 më shumë nga sa pritej, me një deficit të barabartë me 6.6% të Produktit të Brendshëm Bruto. Vitin e kaluar qeveria e Tel Avivit miratoi një buxhet për 2023-2024, por shpërthimi i luftës ndryshoi situatën dhe detyroi autoritetet të rishikojnë ndarjen e fondeve për sektorë të ndryshëm. Ministrat e Partisë së Unitetit Kombëtar të udhëhequr nga Benny Gantz votuan kundër amendamentit pasi kërkesat e tyre për ngrirjen e pagave të deputetëve dhe zvogëlimin e ministrive u refuzuan. Formacioni centrist shprehu gjithashtu zhgënjimin e tij që të ashtuquajturat “fondet e koalicionit” nuk u pakësuan më shumë. Një marrëveshje mes Benjanim Netanyahut dhe partive të tjera fetare parashikonte ndarjen e 8 miliardë shekelave për fraksionet ultra-ortodokse që përbëjnë shumicën e qeverisë. Prej tyre, vetëm 2.5 miliardë u shkurtuan.