Vetëm dy ditë pasi marrëveshja për armëpushim mes Izraelit dhe Hezbollahut hyri në fuqi, dy palët kanë akuzuar njëri tjetrin për shkeljen e paktit. Nga njëra anë ushtria izraelite tha se armëpushimi, i ndërmjetësuar nga Shtetet e Bashkuara dhe Franca, u shkel kur disa pjesëtarë të Hezbollahut u kthyen në disa pjesë të Libanit jugor. Nga ana tjetër edhe vetë Hezbollahu lëshoi akuza drejt Izraelit, për shkeljen e marrëveshjes. “Armiku ynë, Izraeli, po i sulmon ata që po kthehen në fshatrat kufitarë”, tha një ligjvënës nga radhët e Hezbollahut, duke shtuar se këto janë shkelje nga ana e Izraelit, edhe në këtë formë. Ushtria izraelite tha se forcat e saj ajrore goditën një objekt të përdorur nga Hezbollahu për të ruajtur raketa me rreze të mesme në Libanin jugor të enjten, pasi të dyja palët akuzuan njëra-tjetrën për shkeljen e një armëpushimi që synon të ndalojë luftimet.