Më shumë se 685 mijë emigrantë nga Libia janë gati të nisen drejt brigjeve italiane. Alarmi është lëshuar nga 007-at e vendit fqinj. Shifra është publikuar në një raport për emigracionin që i dërgohet cdo javë qeverisë. Ndërkohë, edhe dy trupa të tjerë të pajetë janë gjetur në det pas tragjedisë së dy javëve më parë pranë brigjeve të Cutro-s. Bëhet fjalë për një fëmijë të mitur dhe një burrë. Ndërkohë më herët, 1 mijë emigrantë të ndarë në tre varka të tejmbushura, zbarkuan të sigurt në dy porte italiane të shtunën. Tragjedia e fundit me migrantë në Itali, e cila ndodhi më 26 shkurt në brigjet e Kalabrisë, ka ngjallur kritika të ashpra ndaj qeverisë së krahut të djathtë të udhëhequr nga kryeministrja, Giorgia Meloni, për dështimin e saj për të ndërhyrë në kohë për të shpëtuar varkën. Roja bregdetare tha të shtunën se pas një operacioni të madh shpëtimi që filloi të premten, u shpëtuan mbi 1.000 migrantë, ku tri varka u kapën duke u larguar nga brigjet në jug të Italisë. Varka e parë kishte 487 migrantë në bordin e saj, të cilët sipas rojës, u sollën në mënyrë të sigurt në Crotone rreth orës 02:00 të mëngjesit të 11 marsit. Në varkën e dytë ishin rreth 500 migrantë të tjerë që zbarkuan në portin e Reggio Calabrias. Ndërsa varka e tretë kishte 379 persona, të cilët u shpëtuan nga dy anije patrullimi të rojës bregdetare dhe migrantët u transferuan në një anije të marinës të drejtuar për në portin sicilian Augusta. Kryeministrja italiane kishte premtuar më herët se do t’i japë fund migrimit të parregullt detar, si mënyrë për të parandaluar më shumë tragjedi. Ajo madje u dërgoi edhe një letër liderëve evropianë duke iu kërkuar veprim të shpejtë për të zgjidhur problemin afatgjatë të kontinentit me migrantë.