Italia do të largohet prej Iniciativës kineze Brezi dhe Rruga, ka konfirmuar Qeveria e këtij vendi. Administrata e kryeministres italiane, Giorgia Meloni ka njoftuar tashmë Pekinin që do t’i japë fund pjesëmarrjes në iniciativë. Italia ka qenë vendi i vetëm i madh i Perëndimit që ka qenë pjesë e iniciativës qysh prej vitit 2019, një prej projekteve më ambicioze të Kinës në fushën e tregtisë dhe infrastrukturës. Ky vendim ishte kritikuar prej Shteteve të Bashkuara dhe disa vendeve tjera. E prezantuar nga presidenti kinez, Xi Jinping, më 2013, Brezi dhe Rruga synon investim në vlerën 1 trilion dollarë rreth Azisë dhe Evropës. Në projekte përfshihen hekurudha të reja dhe porte detare, me qëllim lidhjen e Evropës me Kinën dhe me pjesë të tjera të Azisë. Mirëpo, iniciativa është kritikuar prej fillimit nga SHBA, si shembull i “diplomacisë që fut shtetet në kurth, përmes borxheve”. Uashingtoni ka thënë se planet e Kinës kanë të bëjnë me projekte të paqëndrueshme dhe të pamundshme financiarisht për shumë vende, duke rënë kështu në kurthin e Pekinit. Nëse do të shkëputej, kontrata me Italinë ka pasur një pikë që parashikonte vazhdim automatik të kontratës në mars të vitit të ardhshëm. Muaj më parë, Meloni e ka quajtur vendimin e Qeverisë paraprake si “gabim serioz” dhe ka dhënë shenja se synon të largohet prej iniciativës. Megjithatë, zyrtarë aktualë qeveritarë kanë thënë se synojnë të mbajnë marrëdhënie të mira me Kinën, pavarësisht vendimit.