Një nga proceset më të rëndësishme gjyqësore të krimit të organizuar që zhvillohet prej kohësh në GJKKO, ka ngecur në fazën e kundërshtimit të dëshmive që janë dhënë nga dy bashkëpunëtorët e drejtësisë Erjon Alibej dhe Skerdi Tase disa muaj më parë, përpara togave të zeza. Këtë të martë dështoi sërish të zhvillohej seanca, për shkak të mungesës së disa mbrojtësve ligjore, të cilët nuk u paraqitën për arsye të ndryshme. Përpara se kryesuesja e seancës të deklaronte mbylljen e seancës, njëri prej te pandehurve, Petrit Qoli u ngrit dhe foli me tone të ashpra në drejtim të gjykatës dhe përfaqësuesve të prokurorisë. Shkak u bë caktimi i kalendarit të seancave, çka solli revoltën e Qolit, i cili tha se ndaj tij po bëhet genocid individual nga padrejtësia e drejtësia.